Bae luna

(titolo originale "Cantones de pache e d’amore")

di

FRANCESCHINO SATTA

 

Istanotte bid’happo in su sonnu

su chelu lucente

de bramas d’affettu comente

sa luche ’e su coro.

Bid’happo pizzinnos

jocande in guruttos

e in prattas de sole.

E a zaja, in sa janna,

a murmuttu,filande

iscarpittas de lana.

E a mama, galana, cosinde

corittos , chin filos de brama.

Bid’happo pasteras, funtanas,

puzones a pore,

in ramos de mendula in frore;

e isposas cantande in su ribu.

(Bae luna

allughemi sa bida.

Bae luna

allughemi su coro;

diat esser bellu, luna ,

inoche a morrer goi )

Bid’happo bezzeddos

in foras, contande

de cando, pizzinnos a zarra,

andaban a mura

in fattu ’e sos rubos

paschende in campura

cabaddos e zubos

e sonnios de gloria.

Bid’ happo –l’ammento a memoria –

su mundu pizzinnu, serenu, tranchillu.

Prenande sa brocca

de s’abba colada,

bid’happo cumpanzos corales

chi commo non sunu.

Bid’ happo,

ghirande, a s’intrighinu, a babbu

in artu in su carru,

tra seghedes d’oro,

de bassamu tintu,sa cara

luchente ’e sudore

alligru e serenu,

cantande a murmuttu

cantones de pache e d’amore.

(Bae luna…

Mama nostra de sos chelos

amparade nos in terra.

Commo e sempre goi.)

 

Nota: I versi tra parentesi sono di Piero Marras