A Raffaele Calamida

Su duttore ’e sos poveros

L’affranzabat su coddu e una pala

unu baculu bezzu jai cannìu.

Unu cappotte mùrinu, ispilìu

lu cuberrabat in s’annada mala.

Lu bidian a fùrriu, a cad’ala,

chin d’unu passu lèpiu, medìu,

dande pro nudda pane a su famìu,

unu mare ’e salude, una fiala.

In “Santu predu”, in “Seuna”, in “S’istrada”,

in cada bichinau, in “Cortessusu”,

cando l’ammentan, torrat su sorrisu.

Commo curat sa Santa Immaculada,

sas pragas galu apertas de Zesusu,

su poveru e s’onestu in paradisu.