Home / Poesia / In limba / Hapo a remenare

Hapo a remenare

M’han a essire sas alas

e hapo a bolare.

Prus innedda  ’e sas cossorjas

-locos de ideales casticaos-.

Prus innedda  ’e sa malissia.

Prus innedda de s’irfadu,

de sos imbirgos  ’e sa zente

chi si bendet pro nudda.

M’han a essire sas alas.

Hapo a bolare

prus innedda de sos pessamentos ligaos

de s’ocrada ammolighinada

…cundennada a sichire a bier

pisiliches de nudda.

M’han a essire sas alas

e hapo a bolare

in su banzicu  ’e su chelu

…pro affranzare sa luche.

Oje

tottu mi paret affusu.

S’anima mea

ingrisada

imbolicande frizzas de belenu

a supuzu si turmentat.

Pro abbrazzare

s’ispantu  ’e s’isperanzia

hapo a remenare

chin sa luche ’e su coro.

 

sezsarda-copy

 

Check Also

tempo

Unu tempus credio…

Unu tempus credio chi fin fundos raros sa malissia e tottu sos irbirgos pro cuffunder …